தலைவியின் வருத்தம்

                            மருதம்

           

           நோம் என் நெஞ்சே! நோம், என் நெஞ்சே

           புன் புலத்து அமன்ற சிறியிலை நெருஞ்சிக்

           கட்கு இன் புது மலர் முட் பயந்தா அங்கு,

           இனிய செய்த நம் காதலர்

           இன்னார் செய்தல் நோம், என் நெஞ்சே!

                          -அள்ளுர் நன்முல்லையார்(பா.எ-202)

                   

திணை

      மருதம்

 துறை

     வாயிலாகப் புக்கத் தோழிக்கு தலைமகள் வாயில் மறுத்த்து

துறை விளக்கம்

         பரத்தையிற் பிரிந்துவந்த தலைவனுக்குத் தூதாகவந்த தோழியைநோக்கி, “தலைவர் இப்பொழுது எனக்கு இன்னாமையைத் தரும்ஒழுக்கத்தினராதலின் என் நெஞ்சு வருந்தும்; அவரை ஏற்றுக் கொள்ளேன்” என்று தலைவி கூறியது.

பாடல் விளக்கம்

        தோழி,என் நெஞ்சு வருந்தும் முல்லை நிலத்தில் அமைந்துள்ள சிறிய இலைகளையுடைய நெருஞ்சியினது புது மலர் முன்னர் கண்ணுக்குத் தோன்றும் பின்னர் தான் அதன் முள் தெரியும். அதுபோல முன்னர் இனியது செய்த என் தலைவன் இப்போழுது இன்னாமை செய்யும் போது என் நெஞ்சு வருந்துகிறது என்று தலைவி கூறுகிறாள்.